Nakon brutalnog incidenta na plaži Kempinski, oglasili se vlasnici susjednih parcela
Grad brez kondota
Objavljeno: 17.07.2020 u Objavljeno: 09:48
Najlipši kondot va Hrvacke još ne rabimo
Entschuldigung, wo ist hier die Toilette?, neki dan me poli naše crikve, doli na placu ustavi me niki tedeško. Ma nič ja tu njega ne kapin Ma mi se pjaža da je reka neku besedu ka bi bila ko naš kondot. I nikako mu povin:
- Ma in Umagburg nix kondont. Kondot je tamo poli i nikog drieva, va onem parku spod naše obćini, za drievon.
- Nix, niks , - povida oni tedeško Vidin da on neće jadan poć za potribu poli onega drieva.
Nikako mi se je skupia, sav se stiska. Vidin da ga va trbuhu se zavija, presiče i da bi čovik, da se za jenu graju, kadi može pustit svoju potribu. Ma da bi i rudnik zlata. Pensan si dobro da j rit gospodarica sakog tela i si pjažan- Ča storit? Ma znan ja onu šinjorinu ka dela u onon baru ki zove Evropa. I zamen za roko onog tedeška i peljan ga va Europu.
-Ma more ovaj tedeško poć poli tebe u kondot, vidiš da mu je priša, sav se stiska kot moj brek kda triba dobit po repu- povin onoj lipoj šinjorini
I tedeško obavi potribu i sav srećan povi
-Tanke, tanke… i gre dalje.
Ma ča ovi turišti pjažaju si domišljan da je u mon gradu sa sila kondoti?. Ma ča će in kondoti?
Ja kda gren poli mog zermana va konobu i popin malvaziie, kad mi je sila gren za njegovu konobu, a breki laju a ja delan potribu. I se si pensan,- ča će nam ti kondoti?- , ma triba ih čistit, prat a ki će to delat. Najlipše je ovako za konobun, ili za nekun grajun a breki laju, a misecu se se pjaža pa i on žbanda svoju glavu.
Ma se domislin, kako je u ono vrime kada se porodila naša Hrvacka, su oni naši obćinari z IDS-a, a poten naš sindaco Vili povidali da će u Umahu storit čuda kondotih i to onih najmodernijih, kakvih svit nikada nij videl. Pensan da smo Fiore i ja kada bi zagledali malo više u dno malvaziie, znali čakulat o tin kondotima. Jednon me moj Fiore i praša:
- Ma Roko san ču da će u tin kondotima biti sa čuda makinet i da judi povidaju da više nećeš morati ti nič delat se će makine delat mesto tebe su silu i potribu!
I sada se tog sićan se san vrtija glavun i nis nič pensal, se mi se to vrtelo va glavi.. I uvik san se domislil kadi je onaj naš vekji kondot ki je bil va našen đardinu, kadi smo spokojno mogi poč posli patride briškule i trešet posli oštarije. Ma koliki put smo spili vina i zakantali i mirno šli u kondot vršiti silu.
Ma kdi su ta vrimena!!
Ma niku veče, je naš Mario s gornje Bujšćine prinesal dobrog terana. U konobi poli Fioreta već kako je užanca smo zaigrali briškule i trešete. Nigder na srid partide Fiore, onako kontentan je započel štoriju o kondotih. Mašto se Mario zdigne z mize i povi:
-Ma ča van je judi, kondoti su pogljed u svit. Ča će reć turišti, kako nimamo kondoti. ma to je vela dišgracija za naš Umah.- sav črljen v uobrazu zakriči:
-Ma ča dela i turistička zajednica i naš sindaco. Još anke kad je zibran za sindaca naš Vili je obećal veli i najlipši kondot va Hrvacke. Ča nije vrime je da se stori jen kondot, kako bi naši gosti mogli vršiti svoju silu. Ma kako bi to bilo da va tvoju hižu pride ospite i sila mu je, a mora poć doli poli breki vršiti potribu. Ma već saka hiža ima kondot, a grad nima. ma kako je to naš Umah! Povij ti Roko ti si silno učen čovik i ti niku besedu reci o kondotu.
Da se mene pita, aš dobro znate da se mene niš ne pita Umahu je potriba za tin kondoton, More tih turištih ki pridu u grad kad im je sila tribaju nigdi tu potribu isparaznit.
Ma kako se mene niš ne pita si pensan da smo mi već odavna v riti i dreku i da smo mi u Umahu već odavna jen veliki kondot.
Tekst je nastao 2011. g i djelomično objavljen u Bujštini
Piše: Zlatan Varelija
.jpg%2C%20bron%C4%8Dano%20posu%C4%91e.jpg?1769536883240)
.jpg?1770914971725)
.jpg?1773577099491)
